26 يناير، 2013

الفارس بيكار *** فارس الريشة و القلم

 حسين بيكار ( ولد في 1913 و توفى في 2002 ) فنان و شاعر و رسام مصري من مواليد الاسكندرية.
هو الشاعر ورسام الكاريكات رحلة من الفن إمتدت لأكثر من سبعين عاما هو من أبرز رواد الفن المصري الحديث.

و اطلق عليه فارس الريشه و القلم و كأنه يحارب بريشة رسمه و قلمه.


بيكار فارس الريشه و القلم

عدالة السماء  
ايه يعني شوية أسى وايه يعني حبة ألم
وايش تكون كل الآلم لو قارناها بالنعم
الدنيا فيها ألم وأنين , لكن كمان فيها النغم
والعيشة من غير ده وده , تبقى بعيد عنك عدم

دروس من الحياه 
علمتني الحياة ان سهم يصيب وسهم يطيش
وعلمتني الدنيا ان الاناني ياخد ولا يعطيش
وعلمتني الحكمة ان الجبان يعري ولا يغطيش
وعلمتني الكرامة أرفع راسي ولا اوطيش

الحظ اعمى   

واقف على الناصية وبييبع ورق يانصيب
وبيوزع على الناس الحظوظ وهو مالهوش نصيب
ياللي بتعتمد ع الحظ وقت الحاجة وفي الوقت العصيب
 الحظ غادر وطايش .. ونادر لما سهمه يصيب 

اعرف نفسك
انا اللي بعضي من تراب الارض وبعضي من اثير
انا الظلام والنور... وجوايا الصغير والكبير
انا اللي ممكن ازحف على بطني وممكن في الهوا اطير
 انا الشر لو اطاوع نفسي وكل الخير لو يصحى الضمير 



الكون العجيب 
الدنيا كورة مدورة ..
بريشة فنان متصورة
 ساعة مضلمة .. وساعة منورة
طول عمرها بتمشي لقدام ...
ومش ممكن ترجع ورا ... !


هكذا الإنسان 
في دنيا الرحم ياابن آدم عديت من الشهور تسعة
وفي دنيا العذاب جيت .. عشان تشقى وعشان تسعى 
وليه ماليك الغرور مادام ما تستحملش م الناموس لسعة
وليه ماترحمش العباد .. مع إن رحمة ربنا واسعة


سؤال بلا جواب 
من جهله كان فاكر ان السعادة في الغنى و راحة البالسأل الحكيم : ليه واحد مش لاقي اللضا .. والتاني عنده ميت فدان ؟
وليه واحد لحافه حرير .. والتاني نايم في الخلا بردان ؟
وليه الحظ أعمى .. بيدي الحلق للي مالهش ودان ؟
قال الحكيم : صبرك يا ولدي .. ده كل وقت وله أدان !!



ذهاب بلا عودة 
مسافر بقلي زمان .. وشايل شنطتيوتايه بين البلدان .. مش لاقي محطتي 
لا قادر أقف مكاني .. وأغير خطتي 
ولا قادر أرجع ورا .. علشان أصلح غلطتي


ساعة الامتحان 
النجاح ياابني مش مسرح ولا سيما تدخلها بتذاكر
عشان تنجح , لازم تسهر الليالي الطويلة وتذاكر
واللي يعلمك حرف اذكره.. وخليك للجميل فاكر
ده فضله عمره مايتنسي , وملعون اللي للجميل ناكر


إفعل ولا تفعل

ياللي عايش حياتك محار بين الخطأ و الصوابوبتسأل على معنى الحلال و الحرام , ولا أنت لاقي جواب
الجنة باب مفتوح .. لا فيه حارس ولا بواب
للي يطهر من الذنوب قلبه .. وربك للعباد تواب


منتهى السياسة
نصيحة لله .. لو تهاجمك رياح الغضب وتحاول تدمير حياتك .. وتنهش العضام و العصب
غني واتمايل مع الريح زي عود القصب
ده عود الخيرزان لو ينتني عمره ما ينكسر
واللي ينقطم من عناده .. عود الحطب 


من التراب للتراب

نصيحتي يابني .. لا تجري .. ولا تمشي على مهلك
وأضحك قوي للدنيا .. عشان الدنيا تضحك لك
وابعد عن رفاق السوء , حتى لو كانوا من أهلك
ولو صابك في يوم الغرور .. إفتكر إن التراب أصلك

 
قد تم نشر بعض هذة الكلمات سابقا لدينا و لكنى اردت تجميعها فى مكان واحد و ارجوا ان تحوز إعجابكم


شكرا لكم
منال رأفت

إبحث فى الويب مع جوجل

Custom Search

LinkWithin

Related Posts Plugin for WordPress, Blogger...

التسجيل

ادخل بريدك الإلكترونى و احصل على احدث المواضيع:

Delivered by FeedBurner