1/25/2013

ماذا يدور برأس النساء *** آراء و أفكار فى الحياة

حوار جديد نبدءه الليله من فضلكم --- 

قال نزار قبانى
قـرأت كــتــابُ الأنــوثــةِ حـرفــاً حــرفــاً ..
ولا زلــتُ أجــهــل مــاذا يــدور بـــرأس الــنّــســاء .. !

نزار قباني ܓܛܟ

السؤال هنا الذى حيرنى بالرغم من اننى انثى هل حقا يصعب على بعض الرجال فهم النساء أو فهم طريقة تفكيرهن؟



*** قالت Princess . M: دكتورة; الاختلافات بين الرجل و المرأة في طريقة التفكير هو السبب في عدم فهم الرجال لنا.
 ردى انا: صح يا برنسيس طيب عندك حل ممكن يفيد الناس اللى بتقرأ؟


*** قالت Princess . M: حل لإية يا دكتورة ... أفضل لنا انهم مايفهموناش.
 ردى انا: ليه يا برنسيس هو ده سبب مشاكلنا كلها ؟

*** قالت Princess . M: مشاكل اي ؟
 ردى انا: المشاكل فى الحياة الزوجيه و بين المخطوبين و المقدمين على الزواج كمان

*** قال استاذ Magdy . Y. M: بالرغم من انى مش قادر ارد بس المشكلة انكم بتتكلموا من موضوع نسوى فقط يعنى تحيز ويصبح الرجل هو اللى مش قادر يفهم المرأة.

*** قالت Princess . M: المشاكل هي بهارات الحياة.

 ردى انا: لا يا استاذ مجدى الموضوع رجالى اكتر منه نسائى لانى بجد عايزة اعرف رأى الرجال ده موضوعهم اكتر مننا.
و الحقيقة يا برنسيس ميمى انا مش مقتنعه بفكرة بهارات الحياة دى لانى بِجَد نفسى الناس تعيش بدون مشكلات.

*** قال استاذ Magdy . Y. M: مفيش اى انسان فى العالم بيعيش بدون مشاكل بس هناك مشاكل بين ناس بتحب بعض هنا ممكن نقول بهرات لانهم لما بيتصلحوا بيكونوا سعداء اما اللى مش فى حب بينهم بيكون الموضوع سيئ جدا و بتكون عيشة هباب

 ردى انا: شكرا لحضرتك على الايضاح يا استاذ مجدى بس من راى حضرتك ايه اللى ممكن يباعد بين وجهات النظر بين الرجل و المرأة؟ 

*** قال استاذ Magdy . Y. M: ان يتشبث كل منهم برأية ولا يتنازل اى منهم للاخر يعنى الموضع بيكون عند وكرامة بس برضة فى ناس بحب تكون انا و من بعدى الطوفان

*** قالت Princess . M: يا دكتورة الراجل لو عاش حياة هادية مع مراته بدون مشاكل بيدور على اللي تعمل له مشاكل و تخلي حياته زي البحر مرة أمواجه هادية و مرة أمواجه زي الجبال

*** قال استاذ Magdy . Y. M: لالالالا مش كل الرجال.

*** قالت Princess . M: أستاذي أختلف معاك. لللاسف معظم الرجال مش بيرضوا باللي معاهم يعني لو معاه ست هادية حيدور على المشاكسة و لو معاه واحدة حلة و محترمة حيدور على عكسها و هكذا للأسف

*** قال استاذ Magdy . Y. M: يعنى لو كدة يبقى النساء لازم تقول النشيد الصباحى خلقنا لكى نعكنن عليهم هههههههههههه

 ردى انا: انا اوافق حضرتك يا استاذ مجدى بس موضوع الكرامة مش لازم ياخد حجم كبير و الا انقلبت الحياه جحيم و كل واحد يقول كرامتى

*** قالت Princess . M:  لو الحياة الزوجية هادية حيقول اي الروتين ده

*** قال استاذ Magdy . Y. M: انا بقول ان فى ناس بتتشبس وتقولى كرامتى و المفروض بين اللى بيحبوا بعض ميكونش فى تعنت

 ردى انا: اختلف مع حضرتك يا برنسيس ميمى مش كل الرجال بتحب المشاكل

*** قالت Princess . M: كل المشاكل ممكن تتحل الا لو مست الكرامة أو حصل إهانة

*** قال استاذ Magdy . Y. M: طيب ما فى ستات كتير بيبقى مش نقصها اى حاجة وجوزها هادئ و كويس و بعدين تقول برضة مش مرتاحة حاسةة بروتين مش للقية حياتى يعنى هنا فى و هناك فى

*** قالت Princess . M: في ستات زي مابتقول فعلا

 ردى انا: كده و ضحت رؤيتى وجهات النظر بعيده جدا.
انا رأيي اننا نبعد موضوع الكرامه عننا شويه علشان نعرف نتفاهم و نكون متسامحين افضل.
اعتقد يا استاذ مجدى انه صعب ان فيه ست تكون زهقانه من حياتها الهاديه و بتقول روتين و اعتقد ان فيه نساء كثيرات تتمنى هذا الهدوء.

*** قالت Princess . M: ابسط سبب للخلاف بين الست و الراجل ان الست بتهتم بأدق التفاصيل و الراجل بيحب المختصر المفيد

 ردى انا: صح جدا يا برنسيس ميمى جبتى المفيد

*** قالت Princess . M: الراجل بيتهم بالمظاهر اكتر و لا يتأثر عاطفيا بالمواقف أو تأثره لا يطول زي الست

*** قال استاذ Magdy . Y. M: لالالا فى يا دكتورة لان طبيعتها من الاساس لا ترضى بأى شيئ

 ردى انا: و ده كمان صحيح بس مع ناس كتير مش كل الناس يا برنسيس ميمى

*** قالت Princess . M: خلينا في العموم و نجنب الاقلية. متفقين؟

*** قال استاذ Magdy . Y. M: برنسس انتى متحاملة على الرجال بس برضة متنسيش ان الرجال الان بقوا مكسورين بسبب عدم مقدرتهم على سير الحياة وتحمل السيت الدفة مكانة دة بيخلية متوتر و عنيف كمان

 ردى انا: كده حضرتك صح يا استاذ مجدى لانك ذكرت الطبيعه التى تختلف على حسب البيئه و التربيه

 ردى انا: صح يا برنسيس احسن خلينا فى العموم

*** قال استاذ Magdy . Y. M: اكيد يا دكتورة الطبيعة هى التى تتحكم فى تصرفات الاغلب من الرجال و النساء

*** قالت Princess . M: انا مش متحاملة انا باتكلم من واقع كلامي مع الناس

 ردى انا: و انا مع حضرتك يا استاذ مجدى فى الحاله اللى حضرتك بتوصفها بس ده على سبيل التخصيص لا التعميم

*** قال استاذ Magdy . Y. M: متنسيش يا برتسس ان كل واضح بيعرض مشكلتة مع وجهة نظرة هو و مش بيكون موضوعى فى الشرح و برضة مش الكل اللى بيعمل كدة

*** قال استاذ سعيد: اخوتى الموضوع بسيط بس لازم ننحى جانبا التشبيه اللى اطلقة استاذ مجدى بين المشاكل بين الزوجين والبهارات لانة يا اعزائى البهارات لا تفسد طعاما انما هى لتحسينة واضافة اللذة علية بينما يموت الحب اذا عرفت المشاكل طريق المحبين اما عن هل يصعب فهم المراة فالاجابة فى منتهى السهولة يا سيداتى واخوتى وهى. ان المراة كائن الرقة هى عنوانة وملمحة الاصلى ولفهم المراة لابد من التعامل معها على هذا الاساس فان رققت لها فلن تقسو عليك ونهاية القول ان عدم فهم بعض الرجال للنساء انما هو نابع من الرجل ولا دخل للمراة فيه (واللة اعلم)

 ردى انا: الحمد لله التقينا فى وجهة النظر الان و هى ان عدم عرض المشكله و طريقة عرضها هم اهم اسباب عدم الفهم و التواصل

 ردى انا: استاذ سعيد الحقيقه التشبيه بالبهارات اول من اطلقته البرنسيس ميمى و هو تشبيه شهير اما عن تعليقك اشكرك عليه لانك بجد ذكرت ما نحب ان نسمعه فعلا

*** قالت Princess . M: "لا للاخوان" : حضرتك فاهم جوهر المشكلة جدا و ان السبب في اختلاف طبيعة كل من الراجل و المرأة و موضوع "صعوبة فهم المرأة" دي هي حجة الرجل اللي حتفضل أزلية

*** قال استاذ سعيد: دكتورة منال و Princess .M شكرا على مشاركتى رايي ولكن لدى ايضاح بسيط ان الرجل لا يريد ان يتخبط دائما فى المشاكل عن قصد منة وانة ايضا هناك من النساء من تشتهى سببا لاقامة مشكلة ولكنى اتكلم عن اساس خلق اللة لكيان كلاهما(الرجل والمراة). اما عن موضوع البهارات فلم اكن اريد تخطيئ استاذ مجدى ابدا انما هو للايضاح ليس الا وراى استاذ مجدى عندى محل الاعتبار انما اردت ان ابين ان البهارات انما هى لضبط الطعام بينما المشاكل هى لقتل الحب فلا وجة هنا للشبة مع اعزازى وتقديرى لثلاثتكم سلمكم اللة وحفظكم .

*** قال استاذ Hany . E: لابد من الغوص في اْعماق الاْخر كي نتمكن من فهمه ومعرفة كيف يفكر،وبهذا فقط يكون الاخر كتابا مفتوحا يسهل علينا ان نقلب في صفحاته،وهذا للرجل وللمراْة علي حد سواء...

 ردى انا: اشكر حضرتك استاذ سعيد انا معك تماما فى الرأى و فعلا هذا النوع من النساء موجود طبعا و كذلك هو موجود فى الرجال و انا بصفه عامه ضد التعميم فى اى شئ و انا كما ذكرت حضرتك و كما ذكرت انا ايضا سابقا لا اؤيد فكرة و جود مشكلات و لا افضلها و لا اعتقد انها مفيدة على الاطلاق و اعتقد مثلك تماما انها قاتله للحب و الموده

 ردى انا: اشكر مشاركتك القيمة استاذ هانى عويس و اشكرك على رأيك الرائع لاننا فعلا فى حاجه لفهم بعضنا اكثر و انا اؤمن بان كل ما يقال للرجل يقال للمرأة لان الله قال فى كتابه العزيز _ ولهن مثل الذى عليهن بالمعروف_ و بهذا تساوى كل من الرجل و المرأة فى الحقوق و الواجبات مع اختلاف النوع و الطريقهالى ذلك Hany . E

 ردى انا: و لى تعليق بسيط اعتقد انه هو السبب فى كل ما نلاقيه من مشكلات و هو ان كلا من الرجل و المرأة و خاصة فى الشعوب العربيه يخاف ان يظهر التفاهم و الحب للاخر حتى لا بشعر الطرف الاخر بالكبر او بالثقه الزائدة و يشعر انه امتلكه و بفعل ما يشاء كنوع من التحكم --- و لكن رأيى الخاص ان هذا راجع الى النشأة و البيئه التى تربى بها هذا الانسان و اعتقد ان الرجل او المرأة كلاهما لا يحب المشاكل و يحب الكلمة الرقيقه و يجب ان نفتح معه باب الحوار لحل المشكلات دائما

*** قال استاذ احمد .ع . ا: السلام عليكم
اهلا بالجميع فعلا موضوع قيم وجميل جدا ويحتاج لبحث طويل للوصول لاسباب المشكلة وحلولها ولكن لى وجهة نظر بسيطة اظنها لا ترقى لافكاركم الجميلة والرائعة

فالرجل والمراة هما انسان واحد خلقا من بعضهم شى واحد انقسم نصفين فبالضرورى ان يجمع ويحتوى كل نصف نفس امكانيات ونفس صفات ومتطلبات النصف الاخر الا فى اشياء بسيطة ميز الله بها كل منهما عن الاخر لاستمرار الحياة وتنوع وتطور جميع مراحل الزمن

فقال تعالى يا ايها الناس اتقوا ربكم الذى خلقكم من نفس واحدة وخلق منها زوجها وبث منهما رجالا كثيرا ونساءا واتقوا الله الذى تسائلون به والارحام ان الله كان عليكم رقيبا. صدق الله العظيم. سورة النساء

فليس هناك اعظم من الاسلام فى توضيح الصلة بين الرجل والمراة والعلاقة التى يجب ان تكون بينهما وليس هناك ادل من انهما يتساويان فى اغلب الاشياء ومنها الثواب والعقاب والواجبات وجعل منها سكن للزوج وراحة له بالمودة والمحبة والتواصل والوصال والوفاق بينهما

فالوفاق والتفاهم فى الحياة الزوجية ياتى من التوافق والتفاهم قبل الزواج ولذلك شرع الخطبة لمعرفة كل منهما الاخر وتقييمه وتقييم طباع الاخر فاجبر الوالد على اخذ راى البنت فى الزواج والارتباط بمن سيشارك حياتها طيلة العمر وبهذا الرضى والتفاهم تصبح الحياة سعيدة ومستقرة وينشا بينهم حب وتفاهم ووفاق يجعل من كل منهما مدركا لافكار الاخر وملما بما يجب عليه ان يفعله تجاهه كل منهما للاخر

فان حدث ونشا بينهم اى اختلاف فى الراى او المتطلبات المعيشية فبالتاكيد سيتعاونان على حلها والتوصل لتلافى اى اثار سلبية قد تنشا من هذا الاختلاف

فعلى الرجل ان يلبى طلبات زوجته على قدر استطاعته فى كل النواحى الزوجية والمعيشية وعلى الزوجة تقدير والرضا بهذا القدر من الاستطاعة لدى زوجها فعلى كلاهما النظر للاخر انه مكمل لبعضه ولنصفه الاول

فعلى الرجل انلا يتكبر عليها وانلا ينقصها حقها وان يحفظ سرها وان يستشيرها فى جميع اعماله ففيه البركة والخير لكليهما

وهى عليها ان تطيعه وتحسن الاستماع له وعدم تحميله فوق طاقته والرواح عنه وقت تعبه وهمه وحفظ اسراره وعدم كتمان اسرارها عنه ومشاركته فى جميع امورها

فان عامل الرجل زوجته على انها انسانه رقيقة وحنونة وتحتاج للحب والحنان اكثر من غيره وان يكون الحب والحنان صادقا فيه

وان تعامل الزوجة زوجها على انه انسان مخلص ويعمل بجد فى اسعادها وان تكون له سندا وسكنا وراحة له فى بيته عندها سيجتمع الحب والالفة والمودة بينهما ويهون كل شى وكل المشاكل التى قد تنشا بينهما فيما بعد

البحث فيه طويل وكثير ويطلب الجهد الكثير للوصول لحل يرضى الجميع شكرا لكى دكتورة منال على الموضوع القيم الجميل

 ردى انا: شكرا استاذ احمد على الرد الرائع المتكامل فقد جمعت اغلب اسباب الخلافات الجوهريه فى حياتنا و الف شكر لانك وضعت يدنا عليها

*** قال استاذ احمد .ع . ا: تسلمى يا دكتورة ده من ذوقك ربنا يكرمك


شكرا لكم
منال رافت

إبحث فى الويب مع جوجل

Custom Search

LinkWithin

Related Posts Plugin for WordPress, Blogger...

التسجيل

ادخل بريدك الإلكترونى و احصل على احدث المواضيع:

Delivered by FeedBurner